Matthes vertällt Ein Blick in die Unendlichkeit Dat schwatte Looek
Hadder dat och mötjekreije? Dooe häbben doch neulich enne jruoten Huop van internationale astronomische Wissenschaftler en et Universum jet fotojrafiert, wat et jar net jövvt, nämlich en jruot Looek.
Die häbben sech avjesprooeke on van üewerall op de Welt op dä selven Tiet möt janz jruote Teleskope dän Hieemel avjesoot, on dooe wooer et op ens, dat Looek. On dat Looek es schwatt. Nou bestieeht jooe en schwatt Looek ut janz vüel Nix möt ärg vüel drömeröm. Wenn dooe nix drömeröm wöer öm dat Looek, dann wöer dat jooe och jar kin Looek – verstodder?! Ech wieet, dat es ärg schwooer tu bejriepe, äwer die physikalische Astronomen, dat send jooe de reinste Intellijenzbestien. Die häbben enne Kopp wie en Stadthuus, sons küeßen die selvs net bejriepe, wat se dooe fotojrafiert häbbe.
Dat schwatte Looek soll en de Jalaxie M87 dren sieen, on die leggt ärg wiet van os weg.Wie soll ech Öch dat erkläre? Stellt Öch vür, Ihr dejt nooe Australien fleje, dat düert wahl üewer twentig Stond. Dat leggt nämlich op de angere Sie van de Welt. On wenn Ihr dann dooe aanjekuome wöert on heit jerelt de Muor av on dä Papp op, dann wöert Ihr mar bluoß enne Millimeter nöeder an dat schwatte Looek eraanjekuome. Dat leggt noch janz wiet henger et Eng van osser Melksstrooet, häb ech jehüert. Velletz send dooe och noch enne jruoten Huop angere Strooete tösche, velletz jooe och noch en Kakaostrooet - wat wieet ech.
Nou frocht m‘r sech jooe, wat hät et dann ejentlich op sech möt die Jalaxie M87 on dat schwatte Looek. Ech well Öch sägge, wat ech jlüev. Ech bön sieeker, dooe es de Höll, dooe set dän Düwel dren. Wofür sollden dat Looek dann och sons joot sieen? Son jruot schwatt Looek bruk doch kin Mensch. Wenn m‘r sech ens möt Verstank dat Looek möt dat Drömeröm jenau beluort, dann süt dat op dat Fotto ut wie en Düwelsjesieech. Dat schwatte Looek es die Nas, dä Monk es suo hell als wie dusend Sonne, on drömeröm die Visaasch es jlönisch ruot wie en Düwelsfüer. Ech wieet jooe net, op dän Herrjott all ens selvs dooe jewässt es. Die Rees hei jooe suo lang jedüert, dat hä für nix angersch miehr Tiet jehatt hei. Joot, ech neähm aan, wenn dä örjes her flücht, dann jieeht dat jet flotter als wie be os möt dä ICE van osser Bahn. Dooemöt kömmt m‘r jooe och dä halven Tiet tu laat. Äwer dän Herrjott hätt jooe och angere Möglichkieete. Dä kennt jooe Jott on de Welt. On wenn dä jet van dän Düwel well, kann dä däm jooe och aanrope off en Mail schecke.
Dat Looek soll suo schwooer wie en Biees sieen on suo jruot wie vier Milliuone Sonne. Dat kann ech mech jarnet vürstelle. Wie kann dann en Looek suo schwooer sieen. On wat well dän Düwel dann möt son jruote Höll. Joot, wenn m‘r bedenkt, wie lang de Mensche all op de Welt Ondüesch aanjestellt häbbe, dann kömmt all enne jruoten Bärm van Aspiranten für de Höll tusame. Äwer wat dän Herrjott sech dobee jedeit hät, dat alles suo wiet en dä Weltraum vanenanger av es, mööt ech ens jeär wieete. Dat hei doch jenügt, wenn dä dat Look be os en de Melksstrooet installiert hei. Dooe es och noch Platz satt on jenoch. Wenn m‘r bedenkt, wie wiet et bes nadde Marsmännekes es, dann wöer op dä Weäg wahl och Platz satt on jenoch für dän Düwel sin schwatt Looek. Äwer die Weje des Herrn send jooe unerjründlich, wie m‘r wit.
