Bömke verwessel dech
Von Trainern, Toren und Träumen
Wenn ech noch ens op de Welt komm, dann werd ech Footballtrainer. Dann wird et mech nie langweilig. Wenn ech be dän ieene Klömpkesklub ongerschrieeve häb, dann mot ech all möt een Oug nach enne angere Verein luore, wuo ech velletz als nächstes aanfange küeß, wenn se mech wier erut schmiete. Dat mejk mech dann äwer och nix ut, Hauptsaak de Jrüemels deje stemme. On ov ech nou dooe off dooe Millionär werd, dat wöer mech sowiesuo ejal.
Nou säggt ens selvs, es dat net enne prima Aapestall, osser Bundeslija? Wenn son Spielsaison jeluope es, dann jövvt et wahl kaum noch enne Verein, dä möt dä selve Trainer ophüert, wuo hä möt aanjefange hät. Bluoß däjenije, dä möt sin Böersch Mieester jeworde es, dä es fein erut, dä dörf blieve. Dat hit, wenn hä net selvs velletz lieewer örjes angersch aanfängt, wuo de Flieeschpött jet jrötter send. De Sklavenhändler stond jooe all schlange. Also, ech kann jooe nix dofür, wenn se jrad wier ieene erutjeschmieten häbbe, van däm ech noch nix jewieeten häb. Äwer wenn m’r all ens die nömmt, die en de letzde Weäke be dat „Bömke-verwessel-dech-Spieel“ dobee wooere, dann kömmt all enne jruoten Huop tusame.
En Jlabbach: Favre für Frontzeck — dat wooer wahl en bödche laat. Be dä HSV: Oenning für Veh — dat hölpt wahl net vüel. Op Schalke: Rangnick für Magath — häm se däm net all ens vür twiee Jooehr dooe jeschasst? Wolfsburg well partout net avsteije. Dä Meistermacher Magath es he joot für twiee: Litti on dä Hoeneß mödde jooehn. Leverkusen: Heynckes hät kin Loss miehr — Dutt soll et maake. Frankfurt: Endlich häm w’r dä Koks-Küenig Daum wier en et Lank — Skibbe muoß dän Dyk avtrecke.
Ja, on dann häm w’r dooe jooe noch dä beliebteste Verein en Deutschland: die Bayern ut München. Dä ruode Kopp van dä Hoeneß wooer jooe bald an’t platze, als klooer wooerd, dat et des Kiehr nix jövvt möt Mieester, Pokalsiejer on Champions Leage. Also es dän Tiet für dä holländische Partyküenig van Gaal och bald öm. Soll et dann jetz en echt dä Heynckes noch ens jerieet maake? Also, wenn ihr mech frocht, ech dej dänne jooe lieewer dat rhetorische Wunderkenk „Lodda“ Mathäus jönne. Dann jöev et wenigstens jenoch für tu lache on tu lästere en dä Aapestall Bundeslija. Velletz jövvt et jooe en München och noch dat ieene off angere Mädche onger twentig, die dä Kicker-Weltenbummler troue kann. De Medien stond all parat.
Wie jeseit, wenn ech noch ens op de Welt komm, maak ech möt be dat Spieel. Ech kann jooe janz klieen aanfange, velletz be dä KFC. Neulich wooer jooe dat fiefontwentigste Jubiläum van dat „Spiel des Jahrhunderts“ tösche Bayer Uerdingen on Dynamo Dresden. Dat wooere noch Zeiten en Krieewel, wat? Krieewel en dä Europapokal — wer wit, wenn ech he Trainer werd, brekt velletz enne janz nöien Tiet he aan. Ech senn all die Schlagzeile en de Boulevard-Presse vür mech: KFC Uerdingen schießt die Bayern ab! Unter Meistermacher Matthes Körschkes und Assistenztrainer Friedhelm Funkel schlagen die Niederrheiner die Münchener in der ausverkauften Grotenburg mit 2:0. Lothar Mathäus vor dem Rausschmiss. Ehefrau reicht die Scheidung ein.
