Dis Wäche wo´er ich om Hilijen un ming Mo´eder ko´en et, wie immer, nit verstonn, dat ich m´r dat aanseh. Ich kenn Lück, die hocken jeden Daach fü´ irjendwelchen dusselijen Sendungen, die alt Jo´ehr un Daach loofen. Ming „ Sendung“ äwwer kütt eenmo´el im Jo´ehr fü´zwei Wächen un dann wo´er et dat widder. Ich lach mich immer schlapp un mingen Mann kritt den Driss un jeht nom Bett. Jood, dat in dä Zick kinn „wichtijen“ Fooßball kütt. Immer wenn et janz doll mit den Dollen im Camp is, dann schriew ich mit minger Verwandtschaft in Schleswig Holstein. In su Situationen is et mim Handy herrlich. Dä eijene Mann kann üwwer den Kro´em nit laachen, dä anger besüüd sich dat uch un hät jenau den Spaß wie ich, drümswillen Handy russ un dann jeht et loss mit de Schriewerei — wat jo uch nüx angerschtes is, wie lästern.

Dis Jo´ehr is im Bösch etliches janz angersch- jojo, den fiesen Kro´em mössen se immer noch essen, öm selwer jet angerschtes wie Bunnen un Ries ze kreejen, äwwer dis Jo´ehr stellen se sich all so dusselich aan, dat et noch nit vill angerschtes jejowwen hätt, wie Ries un Bunnen. Dann verjessen se nit bluus, dat üwwerall Kameras sinn, nee, se haalen sich nit an de Rejeln. Nu hannt se alt etliche Daach nüx mih ze roochen kreejen (wat dat sozial Verhaalen van eenem nit jraad fördert), willdat se widder jejen de Rejeln jespillt hannt: Nä´ehrts mössen do immer zwei Lück am Fü´er sitzen un zesammen uppassen, äwwer wat machen die? Entweder sitzt bluus et Tina York do, dat is die, die „Wir lassen uns das singen nicht verbieten!“, jesongen hätt. Wenn et, wie et ussüüt, do in de Nä´ehrt nit schloofen kann, nit uppasst, dann schlo´efen se entweder all, oder bluus eener is am Fü´er, willdat dä jenije sich nit traut, de angeren Lück ze wecken. Oder se kallen üwwer Sachen, wo se nit van kallen dürfen, oder verjessen sich et Mikro widder ömzehangen. Jott jo!!!

Ich will üch nu nit mit mingen Dschungelkro´em langwielen, äwwer ich sach et jo immer widder jä´en: Irjendwie is in jedem van uss en Stöck Dschungel.

Et jütt Lück, die zerrießen sich de Schnüß üwwer anger Lück, un denken jannit drüwwer noh, dat dä anger den viellerts uch kennt. Wä Kenger hätt, dä kallt sich doch uch dückes um Kopp un Kraaren, willdat de Blaaren sich uch nit immer an de Rejeln haalen. Jood, dann jütt et ens kinn Fernseh, oder ütt et ens kinn Fernseh, oderens nüx Sößes, äwwer dat is et dann bei uss uch schon. Ich haal nüx van Stubenarrest, wat se do in Australien ja quasi zwej Wächen am Stöck hannt. Die luuren den janzen Daach upp dat Fü´er, dometten dat nit ussjeht, kochen Ries un Bunnen , o´ehn jegliche Jewürze- dat is dä verwennte“ Promi Jaumen“ jo jannit jewännt. Ich kann verstonn, dat die noh´en paa Daach wirklich an de Jrenzen kummen. Wenn m´r selver ens ( wat wirklich nit dückes bej m´r vüürkütt ) et Saalz in de Erpel, Nudeln, oder im Ries verjisst, dä weeß, wie fies dat schmaad. Äwwer m´r maad dann et Schaff upp un kroost et Saalz bej de Bahn un dann schmaad et doch.

Im Bösch jeht dat nit. Die hannt eesijen Schmeid, un kreejen nit vill, un dat, wat et jütt, schmaad noh´nüx. Jestern hannt se endlich ens jet jood jemaad un sujet wie en Plätzchen mit Schokelaad kreejen- wat jlööwt ihr, wie die dat jenossen hannt.

Wat m´r äwwer uch bewußt wü´erd is, dat dä janze Üwwerfluß, den ussereen mittlerweile jewennt is, jo uch nit immer su wo´er. Wie ich kleen wo´er joow et en paar Fernsehsender un dat wo´er et. Sujet künnen sich de Kenger hück jo alt nit mih vürstellen- de Kengersender duudeln 24 Stond, un dann jütt et jo noch etlichen angerschtes, wat de Blaaren hückzedaachs bespillen künnen. Dovan is de Leo äwwer noch janz wick fott.

M´r mood, wenn jet wo´er in en Telefonzelle, hück hätt baal jeder en Handy in de Täsche, un wä dat nit hätt , is quasi russ uss dem Spill. Wä van üch weeß denn, wo de nächste Telefonzelle steht? Et jütt baal nüx, wat et nit jütt.

Manchmo´el denk ich, wenn ich m´r dat Dschungelcamp besinn, wat wö´er dat schön, ins en paa Stond eefach su dozesitzen, nüx ze donn, eefach bluus in et Fü´er luuren un singen Jedanken freie Bahn lo´eßen.

Ich mach m´r jetz selwer en Dschungelpröfung: Wenn ich dat jeschriwwen hann, jank ich russ, holl noch en Stöck Hoolz, schmieß dat in den Kamin, setz mich fü´dat Dengen un jonn jet in mech. Äwwer et soll nit lang duuren un ich fang et prakesieren aan, wat ich morjen alt widder koch. Angersch als bej den „ärm Lück im Dschungel“, joow et bej uss alt länger kinnen Ries — jo, ich jlööw ich koch Ries, äwwer mit Salz!!! Un wenn die „ärm Lück“ etliches in ihrem Lä´erwen angersch un richtich jemaad hääden, dann mö´erten se sich nit im Bösch zem Aap machen lo´eßen.

Äwwer su is et, un su bliewt et.

Un uch nächstes Jo´ehr sitzen widder angere do öm et Fü´er in Australien, un ich upp mingen Sofa un lach! BK