Matthes vertällt Die Umgestaltung des Karlsplatzes hat begonnen Nou jieeht et wärm draan
„Jank schliee! Op dä Karlsplatz es Ies!“ Suo seiten die alde Krieewelsche für jieemes, dä denne op de Nerve jing. Woröm nou utjereäkend op dä Karlsplatz Ies jejeäwen hät, wieet ech net. Ech häb dä Spruch et irschde Kiehr van minne Opa jehüert.
Dä sprooek möt mech mar bluoß Krieewelsch Platt. Dat wooer hä van sin Ärbetsstell als Appreteur be de TAG suo jewännt. En paar Mooel en de Weäk jing Opa et ooeves en die Wieertschaft van Janses Steck ömmer noch kellnere.
Dooe wooerd och mar bluoß op Platt jekallt. Äwer dat es all lang her. Dat es all jar net miehr wooehr. Noch vüel fröiher, als op dä Karlsplatz noch kin Museum stong, dooe wooer dooe jooe ärg vüel Platz, suo dat dä Wenk dooe jerejelt drüewer weg feäje kuoß. On wenn et dann em Wenkter suo kalt wooer, dat m‘r sech bald de Fott avfrieere dej, dann wooer et op dä Platz sieeker ärg jlitscherig. Dooe hät sech sieeker och dän ieen off angere be et Uutröttsche fies dän Hengerschde verstuckt.
Nou send se jooe endlich op de Schöpp jespronge on häbben dooemöt aanjefange, wat se sech all vür vier Jooehr vüerjenooemen haade. Et jieeht nou wärm draan möt die Wirkerej op dä Karlsplatz. Et soll jooe dä schönsde Platz van janz Krieewel werde – ech häb nix dojeäje. Dä Wellem häbben se jooe all vür Jooehre öm dä Eck jebreit, dooe stüert dä net suo ärg. Wat soll dä och op enne Joseph-Beuys-Platz. Die twiee heien sech sieeker net joot verstange. Ech neähm wahl aan, dat dä Wellem an dä Beuys sin Schpeckschwarte on däm sin Filzmatten jar kinne Verstank draan kreig. Äwer dat jieeht manch angere Lüh och suo. Dä Joseph-Beuys-Platz stieeht jooe medden op dä Karlsplatz drop. Enne Platz, dä op enne Platz stieeht, Wuo jövvet suojet noch örjes angersch? Joot, dä Beuys sinne Platz es ärg klieen, dat es suotusägge mar bluoß en Plätzke. On dooe wonnt och nieemes draan on dröm. Dooe stieeht mar bluoß dat Huus van ossere alde Preußen-Kaiser drop: Kaiser-Wilhelm-Museum, Joseph-Beuys-Platz 1. Vür de Düer van dat Museum dä Beuys sin Plätzke, on drömeröm es alles Karlsplatz.
Suojet jövvet janz bestemmt net noch ens op de Welt. Äwer wir Krieewelsche send jooe och en besongere Zooert. Et jövvt net ömsües Jute, Böse on Krefelder. On desweäje mot dä Joseph-Karlsplatz möt dat Kaiser-Beuys-Museum drop jet janz Besongersch werde. Dofür häbben sech die Planer dat ieen off angere utjeklockt. Wenn dä Platz ens feärdig es, soll et suo utsieehn, als wie wenn osser Museum dooe wie op enne Teppich ut Sie‘ drop stöng. Ech bön jespannt, wie se dat bewerkstellije wolle. Ech kann et mech noch net suo reit verstelle, äwer ech mot et jooe och net maake.
Die Hauptsaak es, se kriejen et her, dat et enne richtig schüene Platz wird, wuo m‘r jeär herjieeht für tu reäste, wuo et vüel tu kieke jövvt on wuo och ömmer jet loss es. Osser Museum häbben se suo schüen renoviert. Dat hät et be Jott verdennt, dat et vür de Düer on ronkeröm jenau suo schüen wird wie bönne. Dann fengt sech sieeker och flott wier ieene, dä die Gastronomie üewernömmt. Ech häb jehüert, dat dooe op dä Platz och Water-Jitsch-Fontänen drop kuome. Wenn die vür dä Wenkter net op dän Tiet avjestellt werde, kann m‘r dann velletz wie en dä alden Tiet wier sägge: „Jank schliee! Op dä Karlsplatz es Ies!“
