Matthes: Schüen he en Krieewel?
Mit so ein paar Bierchen an Karneval . . .
Morje es et wier suowiet: die alde Wiever stürme et Stadthuus, setten ossere OB av on üewerneähme möt Prische on Breetlooksprängels et Rejiment. Wer sech en Krawatt öm dän Hals jehange hät, es et selvs en Schold, denn dä krett dat Deng van die Möhne avjeschnie’e. M’r dieet also joot dooeraan, sech net jrad dä schönsde on allernöiste Schlips ömtubenge. An sonnen Daag bön ech ömmer möt die Böersch op Jang. Möt dat ieen ov angere Bierke drenke w’r os dann die alde Wiever schüen.
Ihr wit jooe: henger et schäbigste Maske es mirschdendieels de schönsde Maid verstoppt. Die Wiever, die sech en schüen Maske vür et Jesieech jehangen häbbe, die häbben et döcker wahl ärg nöddig. Äwer wat soll et, Hauptsaak jederieene hät sin Freud. An sonnen Daag feng ech et richtig schüen he en Krieewel. Wie jeseit, möt en paar Bierkes . . .
Et Stadtmarketing hät dat jooe och als ossere nöie Slogan utjejeäwe. Et hit nou net miehr „Krefeld, Stadt wie Samt und Seide“ — nä, „Krefeld — schön hier“! M’r mot mar bluoß draan jlüewe. On, iehrlich jeseit, als echte Krieewelsche fengt m’r et nörjes angersch jooe och schönder als wie en et ejene Städtche. Op Ruosemooendaag setten w’r dann noch ieene drop. Ossere Zoch treckt duor de Stadt onger et Motto „Was sind wir doch Spitze“. Wie hit et doch suo schüen: Bescheidenheit ist eine Zier, doch weiter kommt man ohne ihr. (Dat Zitat häb ech übrijens net selvs erfonge, ech häb et örjeswuo avjeschrieeve; ech wieet äwer net miehr be wäm.)
„Krefeld, schön hier — wuoangersch es et och net beäter“, suo hedden et letzde Weäk en et Stadtwaldhuus op die Sitzung van de Doctores humoris causa. Die Schlatefexe häbben sech selvs on osser Krieewel dobee jerejelt duor dä Kakao jetrocke. Et es dobee erut jekuome, dat et en Krieewel ärg schüen es, wenn m’r an die Stelle, wuo et net schüen es, net suo jenau herkiekt. An dän Ooewend häbben die Uzvögel op ihr 111-jöhrig Jubiläum ossere Oberbürjermieester dän Doktorhoot op dä Kopp jesatte.
Dä muoß nou bewiese, dat hä doll jenoch wöer, als dä Nöie en die humorije Fakultät opjenooeme werde tu könne. On dä hät et dänne velletz jezeigt. Ja Jong, dä es als Rapper möt Le’erjack on Schläjerkapp op de Bühn eröm jehöppt wie ieene van dä Bohlen sin Superstar-Bewerber. Wenn dä net all dat Pöstke als Oberbürjermieester hei, dann kües dä jlatt als Entertainer wirke jooehn.
Schüen he en Krieewel? Also em Moment es et noch schüen kalt be os. On wenn m’r sech die Honkshüep en osser Jröinanlare bekieke dieet, dann kann m’r och sägge: Krieewel — schüenen Driet he. Oder fahrt doch ens möt et Auto üewer de Wilhelmshooefallee — also ech meen, versöckt ens dooe tu fahre. Suovüel schüene Schlaglöeker wie dooe kredder en et Leäwe wahl selde noch ens tu sieehn. Äwer, ech well jooe net bluoß meckere. Wie jeseit, wuoangersch es et och net beater.
Schließlich spieele osser KEV-Pinguine jetz bald en de Playoffs on dä KFC es suo joot wie am op am steije. De Dionysiuskirk hät ihre nöien Hoot booevendrop. De Neusser Strooet krett ihre Europa-Bazar, et Papst-Johannes-Huus wird bald abvjerieete, on de Volksbank bout dooe jet Feines Nöies her. Wenn dann demnächst och wier de Sonn schint on de Blömkes an’t Waaße fange — ja, wenn et dann net schüen es be os en Krieewel, dann wieet ech et net.
