Janz Krieewel op de Bieen
Ein Wochenende voller Termine
Kennder och son Lüh, die ömmer an’t Nörjele send on für de Worret vertälle, en Krieewel wöer nix loss? Ja klar, wenn m’r mar bluoß tu Huus vür et Schluffekino set on sech beriesele lött, dann krett m’r net möt, wat en osser Städtche alles op de Bieen jebreit wird. Nou wooer dat jooe an et letzde Weäkeseng net suo janz enfach, sech dat Reite tösche dä Kiekkaas on dat, wat en Krieewel suo jefällig wooer, erut tu söcke.
Für min Traut wooer die Saak äwer all lang klooer: „Un wenn am Freitag dä Kaiser von China nach Krefeld kommt — ich kuck mich jedenfalls die Hochzeit an!“ „Wat dann für’n Hochtiet?“ „Nu tu doch nich so, die Mediens bringen doch in de letzte Zeit nix Anderes.“ Ech mot tujeäwe, ech häb mech dat Weddings-Spektakel möt Willi on Käthe dann och en Tiet lang aanjekieeke, wuo janz London op de Bieen wooer. Miehr Spaß häb ech äwer doch dooe draan jehatt, wie et nooemeddes osser Eishockeyjonges be de WM de Russen van et Ies jefeägt häbbe.
Dän Daag drop wooer ech mech äwer möt Traut einig: wat dä Rudolph ut Herbst Pitt jemäckt hät, dat kieeken w’r os ens aan. Wer net dooe jewäss es, dä kann et net jlüewe: halv Krieewel wooer op de Bieen on jooev sech dooe de Klenk en de Hank. Bier, Zupp on Schnitzel für mar bluoß ieenen Euro — dat wollde sech nieemes duor de Lappe jooehn looete. Suo voll wie an dä Samsdaag wooer et dooe sons mar bluoß op Ruosemooendaag jewäss, wenn dä Zoch dooe langes jetrocke es. Et kann sech äwer och sieehn looete, dat nöie Herbst Pitt. An et Rähmke, vür de Thieek on an de Dösche wooeren sech de Lüh einig: wat en Jlöck, dat he endlich ens wier enne vernönftije Wieert dren es. Wenn dä et net kann, wer sons? Toi, toi, toi, Klaus Rudolph! Op mech kannste tälle!
Et nooemedes wooer dann äwer wier TV aanjeseit. Alles leep suo, wie et sollde: Jlabbach hät jewonne, Kölle hät jewonne, on dä Klopp sinne Kengerjaart wooerd jetz all Mieester. Janz Dortmund wooer op de Bieen on dej fiere. Wer noch joot drop wooer, kuos sech dann für et ooewes jet utsöcke: Jonnt w’r op dä Tanz in den Mai be de Eärpelstour duor seäs Kneipen off lieewer nach de Walpurgisneit en de Zoo off op et Jrillfeäs be dä Nobber en de Jaart. An alle Kante van Krieewel jing an dän Ooewend jedenfalls de Post av.
Be os wooer et och en bödche laat jeworde. Als ech angere Morje et irschde Kiehr duor de Kuffe luorde, stong de Sonn all ärg huoch an dän Hieemel. Tuirsch häb ech mech möt en Tass Kaffe ens vür dä Kaas jesatte on häb mech aanjekieeke, wie janz Rom op de Bieen woer, weäjes dat Karel Wojtyla seelig jesprooeke wooerd. Dann jooev et äwer all Tiet, für dat wir noch en Stöckske dooevan mötkreije, wie en dä Stadtjaart dä Multikulti-Opmarsch van de Jewerkschafte avleep. „Wat machen w’r denn jetz mit dä anjebrochene Mittag?“ frogde Traut. „Hässe dann ömmer noch net de Nas voll van all die Events?“ „Nä, ich weiß wat, wir fahren mit et Rad nadde Rennbahn. Da is doch heut Familientag.“ Wir also op dän Drooeteäsel on nadde Stadtwald jejöckt. Wat soll ech öch sägge, dooe wooer bald janz Krieewel op de Bieen. On och en dä Lang sinne Bierjaart wooer dän Düwel loss. Dooe soll mar bluoß noch jieemes sägge, en Krieewel wöer nix loss.
